Kooxda ka ciyaarta horyaalka Bundesliga ee Bayern Munich ayaa shaacisay in Harry Kane uu heshiiskiisa u kordhiyey kooxda, kaas oo socon doona ilaa bisha Juun ee sannadka 2029-ka.
“Waxaan dareemayaa inaan si buuxda ugu dhex jiro gurigayga oo kale markaan joogo FC Bayern,” ayuu yiri Kane, isagoo hadalkan ku sheegay bayaan lagu shaacinayey kordhinta heshiiskiisa kooxda Bayern Munich maalintii Khamiista.
Kabtanka xulka England ayaa ku biiray kooxda Bayern isagoo ka yimid Tottenham Hotspur sannadkii 2023-kii, wuxuuna tan iyo markaas ka caawiyay kooxda Jarmalka ah inay ku guuleystaan laba koob oo Bundesliga ah, Koobka Jarmalka (German Cup), iyo laba koob oo ah German Super Cup.
Weeraryahankan oo 33 jir ah ayaa u dhaliyay Bayern 156 gool 161 kulan oo uu u saftay tartamada oo dhan, wuxuuna waayihiisii guulaha badnaa ee Munich ku soo gabagabeeyay isagoo ku guuleystay abaalmarinta Ballon d’Or toddobaadkii hore.
Wuxuu noqday ciyaaryahankii ugu horreeyay ee u dhashay England oo ku guuleysta abaalmarintan qiimaha leh tan iyo markii uu ku guuleystay Michael Owen sannadkii 2001-dii.
“Waan jeclahay kooxda, taageerayaasha, iyo magaalada Munich. Waxaan haysannaa koox cajiib ah, waxaana tababare u ah Vincent Kompany oo isna ah tababare aad u wanaagsan,” ayuu sii raaciyay weeraryahankan caanka ah.
“Aad baan ugu faraxsanahay inaan qayb ka ahay kooxdan. Qoyskayga oo dhan aad bay ugu faraxsan yihiin halkan. Waxaan aad u doonayay inaan sii joogo. Hadda waxaan rajeynayaa mustaqbalka, waxaana doonayaa inaan kooxdan weyn kula guuleysto koobab kale oo badan.”
XAFIISKA WARARKA CIYAARAHA
DAYNIILE.COM
