GAALKACYO (DAYNIILE.COM)-Guddoomiyaha Gobolka Mudug ee dhanka Puntland, Faysal Shiikh Cali ayaa ku eedeeyay Dowlada Faderaalka Somalia inay colaad ka hurineyso Gobolka Mudug.
Masuulkaani wuxuu si gaar ah ugu eedeeyay hay’adda u qaabilsan dowladda Soomaaliya diiwaangelinta iyo aqoonsiga dadweynaha ee NIRA inay dhanka Galmudug u diiwaan geliyeen Degmooyin Puntland ka tirsan sida Galdogob iyo Jarriiban taasoo isku dhac iyo colaad keeni karta sida uu sheegay Guddoomiyaha gobolka Mudug ee dhanka Puntland.
“Dowladda Federaalka waxay ka shaqeyneysaa colaad ka dhex dhacda labada dhinac ee Puntland iyo Galmudug” ayuu yiri Gudoomiye Faysal
Sidoo kale Gudoomiyaha wuxuu ka digay in colaad iyo isku dhacyo hubaysan laga abaabulo gobolka Mudug.
“waxaan cambaaraynayaa talaabada qaldan ee ay qaaday hay’adda diiwaangelinta iyo aqoonsiga ee NIRA,waana kuwo ka hor imaanaya dastuurka dalka, waxaana u aragnaa fal khatar gelinaya nabadda, wadajirka, darisnimada iyo xasiloonida deegaanada Gobolka Mudug ee labada maamul”ayuu yiri mar kale Gudoomiyaha Gobolka Mudug ee dhanka Puntland
XAFIISKA WARARKA
DAYNIILE.COM
