Wasiirka Dhalinyarada iyo Ciyaaraha Jamhuuriyadda Federaalka Soomaaliya Mudane Maxamed C/qaadir Cali ayaa maanta booqasho shaqo ku tagay Tuulada Ciyaaraha Stadium Muqdisho, Xarunta Xiriirka Soomaaliyeed ee Kubadda Cagta, iyo Garoonka Eng. Yariisow.Booqashada wasiirka ayaa ahayd mid lagu dardargelinayo horumarinta kaabayaasha cayaaraha iyo dhiirigelinta shaqaalaha iyo ciyaartoyda Soomaaliyeed.
Intii uu booqashada ku guda jiray Wuxuu kormeer guud ku sameeyay Tuulada Ciyaaraha Stadium Muqdisho, laga bilaabo garoonka, Hotel-ka, Xarunta Xiriirka Kubadda Cagta ee dhawaan xariga laga jari doono & qeybaha kale.
Wasiirka ayaana Si Rasmi ah U Daah-furay Xarunta NIRA, oo loo asteeyay in Shaqaalaha Xiriirka Soomaaliyeed ee Kubadda Cagta & Ciyaartoydaba loogu sameeyo Kaararka Aqoonsiga Qaranka.
Waxa uu sidoo kale kormeer ku sameeyay aqoon-kororsi ay qaadanayeen Garsoorka Soomaaliyeed, oo kor loogu qaadayo tayadooda xirfadeed iyo heerka caalami ee ay u baahan yihiin si ay u gutaan waajibaadkooda garsoornimo.
Wasiirka waxaa booqashada ku wehliyay Madaxweynaha Xiriirka Soomaaliyeed ee Kubadda Cagta Mudane Cali Cabdi Maxamed oo sharaxaad ka siiyay Wasiirka shaqooyinka iyo horumarka uu xiriirku sameeyay, gaar ahaan dhinacyada maamulka, tababarka garsoorka, iyo habka casriga ah ee aqoonsiga shaqaalaha.
Mudane Maxamed C/qaadir Cali ayaa bogaadiyay horumarka la taaban karo ee Xiriirka Soomaaliyeed ee Kubadda Cagta, wuxuuna ballan qaaday in Wasaaradda Dhalinyarada iyo Ciyaaraha ay si buuxda u taageeri doonto dadaallada lagu horumarinayo cayaaraha dalka.
Ugu dambeyntii, Wasiirka iyo wafdigiisa ayaa kormeer ku sameeyay qaybaha kala duwan ee xarumaha, isagoo dhiirigelin u jeediyay shaqaalaha, garsoorayaasha, iyo maamulka xiriirka, isaga oo xusay muhiimada ay leedahay in la sii dardargeliyo adeegyada iyo xirfadaha shaqaalaha ciyaaraha Soomaaliyeed.
