XIGASHO LAACIB.NET
“Ma jiro cudurdaar” – Vinicius Jr oo ku dhiirrigeliyay Real Madrid inay mucjiso ka sameyso Bernabéu kadib guuldarro xanuun badan oo ka soo gaadhay Arsenal.
Vinicius Junior ayaa ugu baaqay kooxda Real Madrid inay “dagaal” muujiyaan kulanka lugta labaad ee ay la ciyaarayaan Arsenal, kadib markii lagu garaacay 3-0 lugtii hore ee wareegga siddeed dhammaadka tartanka Champions League.
Real Madrid ayaa haatan halis ugu jirta in ay ka harto tartanka, kadib markii labo gool oo uu dhaliyay Declan Rice iyo mid uu raaciyay Mikel Merino ay Arsenal siiyeen hoggaan raaxo leh kulankii ka dhacay waqooyiga London habeenkii Talaadada.
Kooxda difaacaneysa koobka ayaa hadda u baahan soo laabasho mucjiso ah si ay u gaarto semi-finalka isla markaana ay u sii wado hamigeeda hanashada saddexda koob ee xilli ciyaareedkan, balse xiddiga reer Brazil, Vinicius Jr, ayaa sheegay in aysan jirin wax cudurdaar ah, isagoo kooxdiisa ku dhiirrigeliyay inay dagaalamaan ilaa daqiiqada ugu dambeysa marka ay mar kale la kulmaan Arsenal toddobaadka dambe garoonka Santiago Bernabéu.
Vinicius Jr ayaa ku qoray sheekadiisa Instagram:
“Ma jiro wax cudurdaar ah. Ciyaar xun. Waa waqtigii aan hagaajin lahayn oo aan ku dagaalami lahayn Bernabéu. Garoonkan waxyaabo badan ayaa horey uga dhacay, waana ku samayn karnaa mar kale. Ilaa dhamaadka, HAD IYO JEER!!!!!!”
Vinicius ayaa si cad u muujiyay in Real Madrid ay wali fursad u haysato in ay taariikh sameyso, isagoo taageereyaasha xasuusiyay in mucjisooyin badan oo lamid ah horey uga dhaceen garoonkooda caanka ah.
