KARACHI (DAYNIILE.COM)-Ugu yaraan 10 qof ayaa ku dhaawacantay kadib markii kolonyo ka tirsan shirkadda Korontada ee Dekedda Qaasim lagu weeraray agagaarka garoonka diyaaradaha ee magaalada Karachi.
Safaaradda Shiinaha ee Pakistan ayaa sheegtay in ugu yaraan laba ka mid ah muwaadiniinteeda la dilay halka mid saddexaadna la dhaawacay ka dib markii kolonyadooda lagu weeraray meel u dhow garoonka diyaaradaha ee Karachi.
Safaaradda ayaa sheegtay in weerarku uu dhacay abaaro 11:00 habeenimo Axadii (18:00 GMT) meel ku dhow garoonka caalamiga ah ee Jinnah, waxaana lala beegsaday shaqaalaha Shiinaha ee shirkadda Korontada ee Port Qaasim.
Geo News, oo ah baahinta wararka Pakistan, ayaa sheegtay in ugu yaraan 10 qof ay ku dhaawacmeen.
War saxaafadeedka horaantii Isniintii, safaaradda Shiinaha ayaa cambaareysay “weerarka argagixisada” waxayna codsatay “dhinaca Pakistan inay si fiican u baaraan weerarka, si adag u ciqaabaan dembiilayaasha, oo ay qaadaan dhammaan tallaabooyinka lagama maarmaanka ah si loo ilaaliyo badbaadada muwaadiniinta Shiinaha, hay’adaha iyo mashaariicda Pakistan”.
Xasaan Khan oo ka mid ah saraakiisha gurmadka ayaa Dawn.com u sheegay in 10 baabuur ay ku waxyeeloobeen dabka ka dhashay qaraxa, sidoo kalena ay ku gubteen afar baabuur.
War qoraal ah oo ay goor sii horeysay email ugu soo direen saxafiyiinta, kooxda hubaysan ee Balochistan Liberation Army (BLA) ayaa sheegtay in ay ka danbeeyeen weerarka, oo loo adeegsaday walxaha qarxa (IED).
BLA waxay rabtaa madax banaani Balochistan waxayna qayb ka tahay fallaagada ballaaran ee Pakistan ee gobolka ugu weyn uguna dadka yar, kaas oo xuduud la leh Iran iyo Afghanistan.
Waxaa mamnuucday dowladda Pakistan.
Bishii Agoosto, BLA waxa ay gobolka ka bilaabeen weeraro abaabulan, kuwaas oo lagu dilay in ka badan 70 qof.
Waxay sheegatay weeraro ka dhacay Balochistan, oo ay ku jiraan toddobo timo-jare ah oo lagu dilay Gwadar bishii May iyo dilal bishii Abriil loo geystay dhowr qof oo laga soo qafaashay waddo weyn.
XAFIISKA WARARKA
DAYNIILE.COM
