Agaasimaha Guud ee Hey’adda Socdaalka iyo Jinsiyadda Mudane Mustafa Dhuxulow ayaa shir guddoomiyay kulan muhiim ah oo ay ka soo qeyb galeen Agaasimeyaasha Waaxyaha Jinsiyadda, Baarista, Xuduudaha, lataliyaasha, iyo madaxda xafiisyada iyadoo kulanka looga hadlay qiimeynta tayeynta baasaboorka Soomaaliga iyo xakameynta socdaalka sharci darrada ah.
Mudane Mustafa Dhuxulow ayaa si gaar ah diiradda u saaray xakameynta socdaalka sharci darrada ah, isagoo faray waaxyaha ay quseyso inay si feejigan uga hortagaan tahriibka, waxa uuna hoosta ka xariiqay muhiimadda ay leedahay badbaadinta dhalinyarada Soomaaliyeed iyo in la xoojiyo dadaallada lagula dagaallamayo kuwa ka ganacsada tahriibinta dadka.
Agaasimaha Guud ayaa ka dhageystay warbixinnada masuuliyiinta ka kala socday waaxyaha iyo lataliyaasha, kuwaas oo ka hadlay caqabadaha taagan iyo baahiyaha lagama maarmaanka u ah tayeynta baasaboorka Soomaaliga iyo xakameynta socdaalka sharci darrada ah.
