Waxaa goordhaweed garoonka diyaaradaha Aadan Cadde ee Muqdisho laga soo dejiyay 25 maxbuus uu maamulka SSC-Khaatumo ku wareejiyay Dowladda Federaalka Soomaaliya kuwaas oo tan iyo sanadkii 2023 ku xirnaa xabsiyada gobolka Sool.
Maxaabiistan ayaa waxaa la socday Wasiirka Cadaaladda iyo Dastuurka, Mudane Xasan Macalin, iyo Wasiirka Waxbarashada iyo Tacliinta Sare, Mudane Faarax Cabdiqaadir.
Soo deynta maxaabiistan ayaa timid kaddib socdaalkii naabadda iyo midnimada ee Ra’iisul Wasaare Xamsa Cabdi Barre uu dhawaan ku tegay magaalada Laascaanood.
Wasiirada Cadaaladda iyo Waxbarashada ayaa la filayaa in ay goordhow ka warbixiyaan xaaladda maxaabiista lasoo daayey iyo tallaabooyinka xiga ee dowladda qaadi doonto.
