XIGASHO LAACIB.NET
Madaxweynaha FC Barcelona, Joan Laporta, ayaa si kulul uga jawaabay war-saxaafadeedkii dhawaan ka soo baxay maamulka horyaalka La Liga, isagoo ku eedeeyay inay isku dayayaan inay kooxda xasillooni-darro geliyaan ka hor ciyaarta muhiimka ah ee caawa.
Laporta ayaa yiri: “Bayaan La Liga ay soo saartay wuxuu u muuqdaa mid lagu doonayo in nalagu wiiqo. Maanta waxaan leenahay kulan aad muhiim u ah, waxaana aaminsanahay in waxa aysan garoonka ku gaari karin ay isku dayayaan inay xafiisyada ku helaan. Waan ka jawaabi doonnaa arrintaas,weliba si xooggan.”
Murankan ayaa ka dhashay kadib markii La Liga ay shaacisay in FC Barcelona aysan haysan awood dhaqaale oo ku filan si ay u diiwaan-geliso Dani Olmo iyo Pau Víctor. La Liga waxay ku doodday in Barcelona aysan buuxin shuruudaha ‘fair play’ ee dhaqaale, gaar ahaan arrimaha la xiriira iibka kuraasta VIP ee garoonka cusub ee Spotify Camp Nou.
Laporta ayaa arrintan uga falceliyay si caro leh, isagoo sheegay in kooxdiisu ay la kulmayso weerar ballaaran oo ka dhan ah sumcadda iyo mustaqbalka naadiga. Wuxuu intaa ku daray in Barcelona ay mar walba raacdo xeerarka La Liga, islamarkaana ay diyaar u yihiin inay si xooggan u difaacaan danaha kooxda.
Sidoo kale, wuxuu sheegay in kooxo kale oo La Liga ka tirsan ay ka shaqeynayaan sidii ay u hor istaagi lahaayeen Barcelona, gaar ahaan kuwa ka soo horjeestay go’aanka CSD ee kooxda u oggolaaday diiwaan-gelinta Dani Olmo iyo Pau Víctor.
Laporta wuxuu ugu dambeyn ugu baaqay taageerayaasha FC Barcelona inay xilligan adag garab istaagaan kooxda, isagoo ballanqaaday in maamulkoodu uu si buuxda u difaaci doono kooxda.
XIGASHO LAACIB.NET
