Home Warkii Maamulka Puntland oo beeniyay war sheegaya in sedex qaxooti Itoobiyaan ah lagu...

Maamulka Puntland oo beeniyay war sheegaya in sedex qaxooti Itoobiyaan ah lagu dilay Boosaaso

GAROWE (DAYNIILE.COM)-Warar maanta uu shaaciyay Addis Standard oo ka mida warbaahinta Itoobiya ayuu ku sheegay in sadex ruux oo Itoobiyaan ah lagu dilay deegaanada Maamulka Puntland ee waqooyi bari Somalia kuwaasoo halkaasi qaxooti ahaan u joogay.

Dadkaan la dilay ee Itoobiyaanka ayaa lagu eedeeyay inay Daacish ka tirsan yihiin sida uu u sheegay Addis Standard Soomaali ku sugan Boosaaso oo magaciisa aan sheegin.

Hal qof oo Itoobiyaan ah ayay sheegtay in ay dileen ciidamada ammaanku, iyadoo ay xigtay dhimashada laba kale oo la sheegay in lagu dilay magaalada Boosaaso maalintii xigtay.

Addis Standard oo soo xiganaysay dadka Itoobiyaanka ah ayaa sheegtay in ay aad u bateen xariga, garaacista iyo dhaca aan loo meel dayin ee lagu hayo

Muhaajiriinta iyo qaxootiga Itoobiyaanka ah ayaa lagu hayaa xarig, garaacis iyo dhac aan loo meel dayin sida warbaahinta Itoobiyaanku shaaciyeen.

Dhanka kale Taliska ciidamada Booliiska Puntland ayaa si weyn u beeniyay wararkaani sheegaya in shacab Itoobiyaan ah lagu dilay gudaha Puntland.

“Ciidanka Booliska Puntland wuxuu beeninayaa wararka sheegaya in dad Itoobiyaan ah lagu dilay gudaha Puntland, wuxuuna caddeynayaa in aysan jirin wax dil ah. Waxaa jiray dhacdo yar oo ay dad dhagxaan ku tuureen muhaajiriin, waxaana la qabtay eedeysanayaashii ka dambeeyay” ayaa lagu yiri warka ka soo baxay taliska Booliiska Puntland.

Sidoo kale Boolisku wuxuu sheegay inuu uga digayo cid kasta oo ku kacda falalka noocaas ah.

“Booliisku wuxuuna adkeynayaa in sharciga la marsiin doono qof kasta oo isku daya inuu khalkhal geliyo amniga” ayaa mar kale lagu yiri warka Booliiska

Ugu dambeyn Taliska Booliiska Puntland wuxuu cadeeyay inay ka go’an tahay in la sugo badqabka dhammaan dadka ku nool deegaanadooda, iyadoo aan la kala soocin.

XAFIISKA WARARKA
DAYNIILE.COM