=XIGASHO LAACIB.NET SOMALI=
Tababaraha Barcelona, Hansi Flick, ayaa ka hadlay muhiimada ay leedahay in Lamine Yamal uu si taxadar leh u maareeyo jirkiisa, maadaama uu xilli ciyaareedkan door muhiim ah ka ciyaaray kooxda.
Yamal oo 17 jir ah ayaa ka mid ahaa xiddigaha ugu muhiimsan ee Barcelona, isagoo saftay 39 kulan tartamada oo dhan. Wuxuu dhaliyay 13 gool, halka uu caawiyay 17 kale, taasoo ka dhigaysa mid fure u ah rajada Barca ee hanashada horyaalka.
Haddii Yamal aan lagu soo bilaabin kulanka Girona ee Axadda, waxay noqon doontaa markii ugu horreysay muddo afar bilood ah oo uu kayd ku bilaabanayo. Markii ugu dambeysay ee uu kaydka ku bilowdo waxay ahayd 30-kii November kulankii Las Palmas, markaas oo uu kasoo kabanayay dhaawac canqowga ah. Xitaa markaas, lama weecin qorshihiisa ciyaarta, maadaama lasoo geliyay qeybtii labaad si uu kooxda u caawiyo.
Flick ayaa sheegay inuu doonayo in la iska ilaaliyo daal xad dhaaf ah oo saameeya ciyaartoyda muhiimka ah, maadaama Barcelona ay tartamo badan ka qeyb galeyso.
Hadalka Flick:
“Waxaan aaminsanahay in Lamine uu yahay ciyaaryahan aad u caqli badan oo garanaya sida loo maareeyo ciyaaraha,” ayuu yiri Flick. “Waxaan la hadlay subaxnimadii hore si aan u ogaado sida uu dareemayo, wuxuuna ahaa mid aad u togan.”
“Ciyaaryahan walba waa inuu mas’uul ka noqdaa jirkiisa. Haddii ay dareemaan wax aan caadi ahayn, waa inay nagu soo wargeliyaan. Waa wax aad muhiim u ah maxaa yeelay haddii aad dareento wax qaldan oo aadan daryeelin, ugu dambeyn dhibaato ayaa dhacaysa.”
XIGASHO LAACIB.NET
