ADIS-ABABA (DAYNIILE.COM)-Masuulka u sareeya Midowga Afrika ayaa qirey in dhaqaale la’aan ay soo wajahday howlgalka AUSSOM ee nabad ilaalinta Somalia.
Guddoomiya Midowga Afrika Maxamuud Cali Yuusuf ayaa si cad u sheegay in dalalkii dhaqaalaha ku bixin jirey Somalia ay hada ka caga jiidayaan,isagoona ka digay in Howgalka nabad ilaalinta Somalia ee AUSSOM uu u fashilmo dhaqaale la’aan.
Ciidamada Afrika ee ka hawlgala gudaha dalka Soomaaliya ayaa la sheegayaa inay mudo bilo wax mushaar ah qaadan xili sidaas oo kale uu hoos u dhac ku yimid bilaabashadii howlgalka cusub ee AUSSOM kaasoo sanadkaan cusub qorshuhu ahaa in lagu badalo howlgalka ATMIS.
“Midawga Afrika wuxuu dadaal ugu jiraa sidii dhaqaale loogu heli lahaa ciidamada ka howlgala Somalia, sidoo kale waxaan wada-jir arintaan uga wada shaqeyn doonaa dalalka ay ciidamadu ka joogaan Soomaaliya iyo saaxiibada kale ee caalamka, si aanu u burburn ama u fashilmin howlgalka Somalia”ayuu yiri Maxamuud Cali Yuusuf
Gudoomiyaha Midowga Afrika Maxamuud Cali Yuusuf wuxuu dhanka kale carabka ku adkeeyay in xasiloonida iyo ammaanka Soomaaliya uusan kaliya faa’iido u lahayn geeska Afrika balse uu faa’iido u yahay dunida oo dhan.
XAFIISKA WARARKA
DAYNIILE.COM
