XIGASHO LAACIB.NET
Xiriirka kubadda cagta Yurub ee UEFA ayaa ganaax dul dhigay saddex ciyaaryahan oo ka tirsan kooxaha Real Madrid iyo Paris Saint-Germain, kaddib markii lagu helay inay ku xad-gudbeen xeerarka anshaxa ee tartamada UEFA.
Antonio Rüdiger, daafaca Real Madrid, ayaa lagu ganaaxay €40,000 iyo hal kulan oo uu seegi doono tartanka UEFA, kadib fal anshax-darro ah oo uu sameeyay intii lagu jiray ciyaar ka dhacday Champions League. Ganaaxa ciyaarta ah ma dhaqan geli doono isla markiiba balse wuxuu ku jiraa muddo tijaabo ah oo hal sano ah. Haddii uu sameeyo xadgudub kale muddo hal sano ah gudaheed, ganaaxa ciyaarta ayaa markaas dhaqan geli doona.
Kylian Mbappé, xiddiga Paris Saint-Germain, ayaa isna lagu ganaaxay €30,000 iyo hal kulan oo UEFA ah, sabab la mid ah tan Rüdiger. Ganaaxa Mbappé sidoo kale waa mid aan isla markiiba dhaqan gelin doonin balse uu ku jiro muddada halka sano ah ee tijaabada.
Dani Ceballos, khadka dhexe ee Real Madrid, ayaa isna lagu ganaaxay €20,000, iyadoo lagu helay inuu jabiyay xeerarka aasaasiga ah ee anshaxa.
Dhanka kale, Vinícius Júnior, oo sidoo kale lagu waday in baaritaan lagu sameeyo, ayaa la xaqiijiyay inuusan la kulmi doonin wax ganaax ah, sidaa darteed wuu u ciyaari karaa kooxdiisa kulanka muhiimka ah ee ay la ciyaarayaan Arsenal.
Tababaraha Real Madrid Carlo Ancelotti ayaa heli doona dhammaan xiddigihiisa muhiimka ah kulankaas, maadaama ganaaxyada aysan saameyn doonin kulanka soo socda ee Champions League.
