XIGASHO LAACIB.NET
Maalmaha Carlo Ancelotti ee kooxda Real Madrid ayaa la rumeysan yahay inay gabaabsi yihiin, iyadoo tababaraha reer Talyaani uu wajahayo in shaqada laga eryo kadib guuldarrooyin muhiim ah oo kasoo gaadhay kooxaha Valencia iyo Arsenal.
Kooxda difaacaneysa horyaalka Spain iyo Champions League ayaa si xun looga badiyay 3-0 ciyaartii lugta hore ee wareegga siddeed dhammaadka Champions League oo ay la yeesheen Arsenal Talaadadii, taas oo timid dhowr maalmood kaddib markii ay 2-1 kaga adkaatay kooxda Valencia garoonkeeda Santiago Bernabéu, taasoo keentay inay afar dhibcood ka dambeeyaan Barcelona horyaalka La Liga.
Ancelotti ayaa si niyad-jab leh uga hadlay fursadda ay kooxdiisu dib ugu soo laaban karto kulanka lugta labaad, isagoo qirtay in uu yahay waqti uu “wax walba qashinka ku tuuro”. Inkasta oo tababaraha caanka ah uu wali haysto fursad uu saddex koob ugu keeno Madrid xilli ciyaareedkan, hadana warbixin laga helay Relevo ayaa sheegaysa in go’aanka ku saabsan mustaqbalkiisa uu ku dhow yahay in la gaaro, isla markaana madaxda sare ee kooxda aysan ku qanacsaneyn sida uu wax u maamulayo.
Waxaa la sheegayaa in Real Madrid ay mudnaan gaar ah siinayso in ay keento tababarihii hore ee kooxdooda da’yarta – Xabi Alonso, si uu u beddelo Ancelotti. Si kastaba ha ahaatee, kooxda Bayer Leverkusen oo uu hadda tababare u yahay Alonso ayaa sheegtay in xiddigii hore ee Real uu go’aansaday in uu sii joogo Bundesliga xilli ciyaareedka dambe.
Haddii mucjiso la mid ah tii xilli ciyaareedkii hore aysan dhicin kulanka lugta labaad ee Bernabéu, Ancelotti ayaa laga yaabaa in si rasmi ah looga ceyriyo kooxda uu horay ugula guuleystay koobab badan.
