Warar dheeraad ah ayaa kasoo baxaya dagaal xoogan oo duhurnimadii maanta ka dhacay deegaano hoostaga degmooyinka Buula Burte iyo Halgan ee gobolka Hiiraan.
Dagaalka oo ahaa mid u dhaxeeyay ciidamada xoogga dalka iyo kuwa deegaanka oo iskaashanaya iyo kooxda Al-shabaab ayaa xoogiisa ka dhacay deegaanka Beera yabaal oo hoostaga degmada Buula burte.
Ciidamada iskaashanaya ayaa la sheegay iney si buuxdo ula wareegeen gacan ku heynta deegaanka Beera yabaal iyo deegaanada ku dhadhaw, kadib dagaal saacado badan qaatay oo halkaas ku dhexmaray labada dhinac.
Wararka hordhaca ah ee soo baxaya ayaa sheegaya in dagaalka maanta khasaare xoog leh lagu gaarsiiyay kooxda Al-shabaab oo maalmahii lasoo dhaafay isku aruursaneysay deegaanada u dhaxeeya Buula burte iyo Halgan.
Wasiirka Wasaaradda Gaashaandhigga Xukuumadda Fedaraalka Soomaaliya oo si kooban uga hadlay dagaalkii maanta ka dhacay gobolka Hiiraan ayaa sheegay in jab xoogan la gaarsiiyay kooxda Al-shabaab.
“Maanta waxaa Jab xoogan Khawaarijta lagu gaarsiiyey Gobolka Hiiraan. Waxaan u mahad celinaayaa Geesiyaasha CXDS iyo dadka reer Hiiraan” ayuu yiri Wasiirka Gaashaandhigga Cabdulqaadir Maxamed Nuur.
Ma jirto ilaa hada war rasmi ah oo xaqiijinaya tirada kooxda Al-shabaab looga dilay dagaalkii maanta ka dhacay inta u dhaxeya Buula burte iyo Halgan ee gobolka Hiiraan, marka laga soo tago guula ay dowladda ka sheegtay dagaalka
