Baarlamaanka Maamulka SSC-Khaatumo oo soo saaray go’aamo lagu wajahayo xilliga kala guurka

Baarlamaanka SSC-Khaatumo ayaa go’aamiyay in la dhiso guddi ka shaqayn doona samaynta dastuur uu yeelan doono maamulku, iyo in si dhakhso ah loo qabto shirwayne guud oo masiiri ah, kaasoo horseedi doona in maamulku uu ka baxo ku-meel-gaadhka.

Qoraal kasoo baxay Baarlamaanka ayaa lagu sheegay in guddoomiyaha golaha, oo hore arrinta samaynta guddida ugu riixay hay’adaha garsoorka, uu dib ugu soo celiyay Baarlamaanka maadaama aanay jirin Maxkamad Sare, sidaas darteedna uu goluhu go’aamiyay samaynta Guddiga Dastuurka.

“Goluhu wuxuu meel mariyey in Hindise Sharciyeedka Dhisidda Guddiga Dastuurka la hor geeyo Baarlamaanka si loo diyaariyo dastuur uu yeesho  SSC-Khaatumo,” ayaa lagu yidhi qoraal kasoo baxay Baarlamaanka.

Baarlamaanka ayaa sheegay in dastuurka lagu ansixin doono shirwaynaha masiiriga ah ee la qaban doono, kaasi oo uu dhigayo Axdiga Maamulka SSC-Khaatumo, qodobka 6-aad, farqadiisa labaad.

Hoggaamiyaha SSC-Khaatumo, Cabdiqaadir Aw Cali Firdhiye, ayaa horay u sheegay in la qaban doono shirwayne rasmi ah oo maamulka lagu dhammaystirayo, isla markaana hadda la sii diyaarinayo dastuurkii lagu dhaqmi lahaa.

“Golaha fulintu waxay isku raaceen in maamul-goboleedka inoo soo socda dastuurkiisii hadda la sii diyaariyo. Axdiga waxa ku qoran ayaa inoo ballan ah, dalka lagu dhaqayaa, cidina kama duwi karto,” ayuu yidhi Firdhiye.

Baryahan waxaa taagnaa khilaaf u dhexeeyay Xildhibaanada SSC-Khaatumo oo labo garab kala noqday, kuwaas oo isku hayay munaasibnimada in xilligan dastuur la sameeyo.