Hoggaamiyaha SSC-Khaatumo, Mudane Cabdiqaadir Axmed Aw-Cali, ayaa ka qaybgalay munaasabadda dib-u-hawlgallinta warshadda biyaha Laascaanood, taas oo ay hore gebi ahaanba u burburiyeen maleeshiyaadkii doolka ahaa ee Somaliland.
Warshaddan, oo ah mashruuca biyo nadiifinta ee guud ahaan ugu weyn dalka Soomaaliya, waxaa markii hore maalgeliyay ganacsatada deegaanka, kuwaas oo mar kale burburkii ay maleeshiyaadku u gaysteen ka dib dadaal ku bixiyay dib-u-dhiskeeda.
Hoggaamiyaha ayaa uga mahadceliyay ganacsatada waqtigooda iyo hantidoodaba geliyay hirgelinta warshaddan muhiimka ah.
Sidoo kale, Wasiirka Biyaha iyo Macdanta SSC-Khaatumo, Xildhibaan Cali Warsame Dhakaawe, ayaa xusay in shirkaddani ay noqon doonto hanti ay wada leeyihiin shacabka iyo dowladda, iyadoo loo maamuli doono habka iskaashiga dowlad iyo ganacsato (Public-Private Partnership).
Ugu dambayn, Hoggaamiyaha ayaa caddeeyay in xukuumaddiisu ay ku taagan tahay mabda’a isku-tashi, isla markaana aysan cid kale ku tiirsanayn. Wuxuu sidoo kale xusay in ay muhiimad gaar ah siinayaan ka qaybqaadashada mashaariicda horumarineed ee laga hirgelinayo deegaanka
-DHAMMAAD-
__________________________________________
Xafiiska Warfaafinta iyo Xidhiidhka Dadweynaha Madaxtooyada SSC-Khaatumo
Advertisement
