Ciidamada xoogga dalka Soomaaliya ayaa howlgalo ka dhan ah kooxda Al-shabaab maanta ka sameeyay deegaano dhowr ah oo ka tirsan gobolka Bakool.
Ciidanka ayaa howlgalada si gaar ah uga fuliyay deegaanada kala Wargoloole, Hooyaley iyo Abagbeeday oo ah dhamaantood deegaano dhinaca Waqooyi kaga beegan degnada Xudur ee gobolka Bakool.
Sarkaal ka tirsan ciidanka xoogga dalka, gaar ahaan guutada 9-aad qeybta 60-aad ayaa Warbaahinta Qaranka u sheegay in howlgalada ay ahayeen kuwa lagu xaqiijinaayay amniga guud ee magaalada Xudur.
Sarkaalka ma sheegin wax khasaare ah ama iska hor imaad ah oo ay ciidanka xoogga dalka kala kulmeen kooxda Al-shabaab ee ku sugnaa deegaanada ay maanta howlgaladu ka fuliyeen ciidanka.
Howlgalkaan ayaa kusoo aadaya, iyadoo dhawaan gobolka Hiiraan uu si rasmi ah uga bilaawday howlgalo culus oo Al-shabaab looga xureynaayo deegaanada ay kaga sugan yihiin gobolkaas.
Waxaa xusid mudan in howlgaladaasi iska kaashanayaan ciidanka xoogga dalka iyo kuwa dadka deegaanka ee loo yaqaano macawiisleyda, kuwaas oo durba guulo waa weyn ka gaaray dagaalo ay la galeen Al-shabaab, kuna dilay in ka badan 40 xubnood oo ka tirsana Al-shabaab.
