Dowladda federaalka Soomaaliya ayaa 24 saac ee u dambeeyay qaaday tallaabooyin dhowr ah, iyadoo wafdi sare u dirtay Itoobiya, halka ay geesta kale wada-hadallo ku saabsan galka Itoobiya la yeelatay dowladda Masar.
Tallaabooyinkan oo dadka qaarkood ku macneeyeen is-diidooyinka siyaasadda dowladda madaxweyne Xasan Sheekh Maxamuud ayaa waxaa ka dhalatay fal-celin xooggan, ayadoo dowladda lagu dhaliilay inay ka shaqeynayso danta dalal kale.
Wasiirka arrimaha dibadda Soomaaliya Axmed Macallin Fiqi oo dhiggiisa Masar Badar Cabdilati kula kulmay Qaahira ayaa wuxuu warbixin ka siiyay Badar heshiiskii Ankara ee dhawaan dhex-maray Soomaaliya iyo Itoobiya.
Masar oo qeyb ka noqon doonta howl-galka ciidan ee ATMIS bedelaya ee Soomaaliya ka bilaabanaya 2025-ka ayaa si weyn ula dagaashan Itoobiya, waxayna gobolka Geeska Afrika si rasmi ah usoo jaleecday bilowgii sanadkaan, markaas oo Itoobiya ay daan-daansi ku bilowday Soomaaliya.
Haddaba, sidee looga fal-celiyay arrintan?
Saajid Axmed: “Masar oo la yaaban siyaasada Soomaaliya sababaha aan Masar u aadnay sow kama mid aheyn in Itoobiya inaga celiso hadane Itoobiyadii ayaa dowladeenu u ogalatay sii joogista dalka siyaasad la yaab leh oo aan jiho laheen bee dowladeenu wadaa!!.”
Cabdiraxmaan Madoobe: “Laba wafti aya la kala diray mid Masar aday iyo mid cadawga Ethiopia aaday, waana laba dal oo cadow isku ah, yaa ku aaminaya marka waa isku dhex yaacaas cajaa’ib.”
“Diblumaasiyadeenu waxa ay noqotay cadow loo madax salaaxaayo iyo saaxiibtinino igu soo haad ah,” ayuu yiri Nuur Cabdi Jimcaale.
Cabdixakiin Maxamed ayaa sidoo kale waxa uu yiri “Masar, Turki, Kenya, Itoobiya, mid ba mar in lagu cararo dal laguma difaaci karo ee waddanka aan anaga difaacano ama aan Itoobiya iska siino. Hal milyan oo qof hadii ay ku dhintaan xitaa waan u qabnaa inta soo hartay iyo wixii dhalan doona ayaa si xoriyad leh ugu noolaan doona.”
“Ethiopia iyo Masar see leeysu qabadsiin rabaane?,” ayuu yiri Faarax Xuseen Jimcaale.
Mahad Xasan Cawaale: “Dalkasta danihiisu ilashadaa laakiin Soomaaliya danaha dalalka kala ayey ilaalisaa xukuumadda hada jirta waxaana kuu cadaynasa tan maanta taagan.”
“Waad fashilanteen meel kasta sidan ugu dhac-dhaca ballan inta soo gashan uga baxa, hadda waa la idin yaqaana,” ayuu yiri Ciise Macalin Waddani.
Cabdinuur Ciise: Dowladda Masar in ay Soomaaliya taageerto way rabtay laakiin mowqif la’aanta madaxda dalka ayay ku dabci wayday.”
Kayse Jaamac Ducaale ayaa isna waxa uu yiri “Dowladan ma shacabka Soomaaliyeed ayey u shaqeysaa mise shisheeyahay ayey qancisaa.”
