Booliiska koonfurta Pakistan ayaa toogasho ku dilay dhakhtar lagu eedeeyay inuu aflagaadeeyay nabi Maxamed – nabadgalyo iyo naxariis dushiisa ha ahaato – arrintaas oo ay cambaarayeen kooxaha xuquuqda aadanaha u dooda.
Dr Shahnawaz Kanbhar waxaa lagu dilay si kadis ah markii ay rasaas isweydaarsadeen askar aan ogeyn inuu isaga yahay, sida uu sheegay taliyaha booliiska deegaanka ee gobolka Sindh Niaz Khoso.
Dr Kanbhar ayaa dhuumasho galay Talaadadii ka dib markii lagu eedeeyay inuu aflagaadeeyay nebigii Islaamka ee Muxamed iyo inuu baraha bulshada ku faafiyay waxyaabo aflagaado ah.
Waa tuhmanihii labaad ee looga shakisan yahay in uu aflagaadeeyay Pakistan oo lagu toogto muddo toddobaad gudihiis ah.
Sida lagu sheegay warbixin uu soo saaray booliiska, askarta ku sugan magaalada Mirpur Khas ayaa Arbacadii isku dayay inay joojiyaan labo nin oo saarnaa mooto, si ay u baaraan gaarigooda.
Halkii ay ka yeeli lahaayeen, ayay warbixintu sheegtay in mid ka mid ah raggaasi uu rasaas ku furay. Waxaa dhacay dagaal fool ka fool ah, kaasoo lagu dilay Dr Kanbhar.
Is-rasaaseynta ka dib ayay ahayd markii ay askartu ogaadeen in ninka ay toogteen uu ahaa Dr Kanbhar, sida uu sheegay Khoso, oo ah taliyaha booliiska deegaanka. Qofkii labaad ee saarnaa Mootada ayaa baxsaday.
Sarkaal kale oo booliis ah oo lagu magacaabo Khas Asad Chaudhry, ayaa BBC Urdu u sheegay in Dr Kanbhar uu si lama filaan ah u toogtay saaxiibkiis oo saarnaa mootada.
Si kastaba ha ahaatee, qof qaraabo la ah Dr Kanbhar ayaa BBC Urdu u sheegay in lagu dilay “kulan been abuur ah” – waa arrin ay booliska maxalliga ahi beeniyeen.
Wasiirka arrimaha gudaha ee gobolka Sindh Zia-ul-Hasan Linjar ayaa amray in baaritaan madax banaan lagu sameeyo dhimashada Dr Kanbhar.
Dilka Dr Kanbhar ayaa ku soo beegmaya todobaad kadib markii askari uu rasaas ku furay gudaha saldhiga booliska magaalada Quetta ee koofur-galbeed, halkaasi oo uu si xun ugu dhaawacay tuhmane kale oo loo haysto eedeymo aflagaado ah.
Dhimashada ayaa dhaleeceyn xooggan ka timid Guddiga Xuquuqda Aadanaha ee Pakistan (HRCP), oo sheegtay inay “aad uga walaacsan tahay dilka sharci-darrada ah ee lagu eedeeyay laba qof oo lagu eedeeyay inay aflagaadeeyeen.”
