BAYDHABA (DAYNIILE.COM)-Ra’iisul Wasaaraha X Soomaaliya Xamsa Cabdi Barre ayaa xalay Baydhaba loogu sameeyay xaflad sagootin ah madaama uu maalmihii ugu dambeeyay howlo shaqo u joogay gaar ahaana xalinta mad-madow siyaasadeed oo soo kala dhexgalay Dowlada iyo Maamulka Koonfur-Galbeed.
Casho sharaf-ta iyo sagootin-ta waxaa soo qaban qaabiyay Madaxweynaha Koonfur Galbeed C/Casiis Xasan Maxamed (Lafta Gareen) kaasoo Ra’iisulwasaaraha la wadaagay tabasho badan oo ay qabaan shacabka iyo maamulka Koonfur-galbeed.
Xafladii sagootinta wuxuu xalay Ra’iisulwasaaruhu ka sheegay in Dowladu diyaar u tahay inay ka qanciso maamulka K/galbeed dhamaan waxyaabaha ay tabanayaan isagoona ku amaanay dal iyo Dowlad jaceylka shacabka reer Bay iyo Bakool.
“Waan idiin nimid, waana dhageysanay dareenkiinna, waxaana u howlgalaynaa wixii tabasho ah ee idin kaga maqan dowladda sidii loo xallin lahaa”ayuu yiri Ra’iisul Wasaare Xamsa Cabdi Barre.
Sidoo kale wuxuu carabka ku adkeeyay inay Dowladu qasab ku tahay ilaalinta midnimada dalkeena iyo dadkeena intaba.
“Dowladda Soomaaliya iyada ayaa masuul ka ah Amniga dalka, mana dhaceyso in ciidanka shisheeye haddii ay baxaan Khawaarij waxyeelo geysato, qorshahayaal ayaa nooga dagsan arrimahaas”.ayuu mar kale yiri Ra’iisul Wasaare Xamse
XAFIISKA WARARKA
DAYNIILE.COM
