=XIGASHO BBC SOMALIA=
Soomaaliya, tiro malaha dadka u waxyeelloobay hubka sida sharci darrada ah loo rido iyada oo mararka qaar ay guryaha ugu tagaan qoysas aan waxba ka ogeyn waxa socda ama sababta loosoo riday.
Hodan Saalax waxa ay saygeedii, gabadheedii, iyo labadeedii lugoodba ku weyday madaafiic gurigooda ugu tagay iyaga oo hurda.
Xaflada caleema saarka madaxweynaha 10-aad ee dowladda Fedaraalka Soomaaliya Xasan Sheekh Maxamuud, oo hadda laba sano ay ka soo wareegtay ayaa xilligaas socotay. Madaxweyne Xasan Sheekh waa madaxweynaha kaliya ee mar labaad loo doortay Soomaaliya.
Habeenkii caleema saarka madaxweynaha Soomaaliya magaaladu waxa ay ahayd mid aad u sawaxan badnayd, waxaana muuqatay in shacab iyo ciidan badan ay u dabaal dagayeen soo doorashadi uu ku guulaystay madaxweynaha.
Dabaaldegyada waxaa ka mid ahaa hub loo ridayey raynraynta munaasabadaas.
Laakinse waxaa jira dhanka kale, dad hubkii la ridayey uu guryahooda ugu tegey, kuwaasoo dhibaato ay ka soo gaartay
“Habeenka ay hubku nagu soo dheceen waa habeenkii caleema saarka madaxweyne Xasan Sheekh waxaana ay ahaayeen kuwii dabbaal degga, runtii burbur qoyseed oo aad u weyn ayaa iga soo gaaray hubkii la ridayey, oo waxa aan ku waayay saygaygii iyo gabar aan dhalay iyo lugahaygii walibana xaamilo ayaan ahaa”, sidaas waxaa BBC-da u sheegtay Hodan Saalax.
BBC ma xaqiijin karto cidda soo ridday hubka khasaarahaas gaystay.
Hodan sidoo kale waxa ay sheegtay in isla goobta uu ku geeriyooday wiil yar oo adeer u ahaa ilmaha ay dhashay.
“Xilliga ay dhacdadu dhacday waxa ay ahayd abbaare 1-dii saqda dhexe, qofkii ugu horreeyay ee dhaawac ah ee meesha laga qaaday aniga ayuu ahaa isla goobta lug ayaa iiga go’day halka lugta kale oo dhaawac daran ahayd isbitaalka la’iiga jaray” ayey tiri Hodan.
Ilmihii yaraa ee ay uurka ku sidday ayaa markaas ahaa 7 bilood iyadoo lagu qalay, waxaana ay noqotay gabadh, iyada oo ah cunugga ugu yar ee hadda u jooga Hodan.
“Xaajigeyga ayaa markaas ku soo kacay jugta, wuu i soo kiciyay labadeenna oo barxadda guriga ama daashka isla taagan ayuu na haleeyay xitaa xaajigeyga lugaha ayuu ka go’ay wuuna u geeriyooday dhaawicii”, ayey mar kale tiri Hodan.
Hodan waxa ay sheegtay in guud ahaan nolosheedii ay is bedeshay xilligaas ka dib, waxa ay sheegtay in ay ku nooleyd nolol farxad leh balse hadda qoyskeeda uu kala burburay oo xitaa wiilkeeda weyn uu weli la dhibban yahay wixii ka soo gaaray hoobiyayaasha.
“Wiilkeyga oo toddobo sano hadda sii galaya weli waxaa madaxiisa ku jira firir iyo dhaawac soo gaaray, maskaxdiisa qayb ayey ka nuux-nuuxsaneysaa sidii ilmo hadda dhashay”, ayey tiri.
Hodan Saalax hadda waxa ay ku sugan tahay magaalada Nairobi, waxa ay sheegtay in ay weli raadineyso daryeel caafimaad oo dibadda ah balse ay u suura geli la’dahay.
Nairobi waxa ay la joogtaa ehelo ay halkan ku lahayd waxaase weli jira culeys nololeed oo aan la’iska indho tiri karin.
Waxaa xusid mudan in aabbaha carruurta dhalay ee ka geeriyooday uu ahaa askari ka tirsan ciidamada dowladda ee Soomaaliya, iyada oo Hodan ay sheegtay meesha kaliya ee hadda ay wax ka soo galaan in ay tahay mushaarkiisii oo weli u socda.
Waxa uu qaadan jiray lacag gaareysa 200$ hase yeeshee waxaa jira dad mararka qaar garab u noqda Hodan iyo ilmaheeda
Hodan oo ka hadleysa sababta ay Nairobi u timid ayaa tiri, “waxa aan u imid in aan helno daryeel dheeraad ah iyo sidoo kale in aan helo lugo macmal ah si aan ilmahayga ugu ordo, iyaga oo aan aabbe heysan haddana anigii aan kursi uga fadhiyo waxa ay igu heysaa xanuun badan, laakiin lugihii aan Nairobi ka helay wey igu cuslaadeen kuwo fudud ayaa Jarmalka la’iigu sheegay laakiin duruufta iima saamixin”.
